Gerente di Mental Health Caribbean, Eric Jansen i presidente di AFBW, Cherel Kwidama den presensia di gerensia di MHC, shopstewardnan i konsehero Nòchi Willem a firma un konbenio di rekonosimentu. Ta asina ku durante negosashon entre Fundashon Mariadal na Boneiru, Saba Cares di Saba, Auxiliary Home i SEHCF di Statia komo dunadónan di trabou i na e otro un banda AFBW pa Boneiru, SUPLUA na Saba i ALL FOR ONE na Statia, MHC tambe a sinta na mesa ku e deseo pa nan usa e CAO kolektivo tambe pa nan personal. AFBW a bai di akuerdo i a haña tur koperashon di gerensia di MHC pa organisá e trahadónan den e sindikato. Al fin al kabo e sindikato ta sali na interes di e trahadónan i ta mas ku hustu i korekto ku e trahadónan ta haña un partisipashon real den negosashon di nan kondishonnan i sirkumstansianan laboral. E aserkamentu aki di AFBW a duna su resultado i e gran mayoria di trahadónan di MHC a afiliá na e sindikato i tambe a apuntá e siguiente personanan komo delegadonan (shopstewardnan) di AFBW pa ta bos, wowo i orea di e sindikato riba flur di trabou. Ta trata di Silenne Boelbaai, Narina Steenmijn i Caroll Poulina.
Djabièrnè último tabatin un enkuentro di será konosí entre gerensia di MHC bou di liderato di Eric Jansen i AFBW bou di liderato di Cherel Kwidama, presidente kompañá pa konsehero Nòchi Willem. Despues di a interkambiá den un forma ameno i positivo a pasa na firma e konbenio di rekonosementu. Esaki ta enserá ku MHC ta rekonosé AFBW komo e úniko representante legal di e trahadónan di MHC pa atendé ku e interesnan laboral di e trahadónan. Tambe a sondia e posibilidat pa e trahadónan di MHC na Saba i Statia tambe por afiliá na AFBW.
Ku esaki trahadónan di MHC tambe tin nan CAO ku lo tin balides te ku 31 di desèmber 2026.
