Siman pasa na final di un reunion di negoshashon di CAO partido nan a logra firma un akuerdo di prinsipio pa e CAO 2022 entre Selibon i AFBW.
Selibon i AFBW a negoshá un CAO 2022 pa 2024 i a logra esaki tambe kasi 95%, pero e negoshashon a pega na momentu ku Selibon no por a paga e oumento salarial di 5% pa 2022 i 3.5% 2023 i 3.5% 2024.
Diferente moveshon nan a wòrdu hasi konhuntamente ku B.C. pa por a logra esakinan. Tabata siman nan ku diferente reunion a tuma lugá, pero Selibon no a yega na un solushon i a pidi 7 dia, kual sindikato i miembronan a honra e 7 dia aki tambe. Lamentablemente den e periodo di 7 dia aki ta bini un “walk out di trahadónan, pa motibu nan di revancha pa ku trahadónan riba kontrato i tambe e manera ku ta trata nan komo trahadó. Pa e dia aki mes a yega na areglonan ku otro i trahadónan a bolbe nan boka di trabou bek i a kuminsá duna e servisio bek na komunidat di Boneiru.
Despues ku djaluna dia 15 ougùstùs e 7 dia a pasa a kuminsá ku e lastu proposishon nan i pa djabièrnè último na mesa di negoshashon a yega na e akuerdo di prinsipio. Awor ku e tim negoshadó a kaba ku nan tarea, sindikato a yama un reunion, ayera djaluna anochi 18:00, pa pidi aprobashon di miembresia. Den e reunion aki miembresia a bai unánimamente di akuerdo ku e “akuerdo di prinsipio”, un akuerdo ku tin hopi benefisio i adelanto pa ku e trahadónan di SELIBON.
Loke a wòrdu negoshá i ta den e akuerdo di prinsipio lo bai wòrdu buta den e CAO 2022, a palabra ku lo hasi esaki den un tèrmino di dos siman i ku pa aki dos siman lo firma e CAO 2022.
Direktiva di AFBW ta yama danki na e tim negoshadó di Selibon i AFBW i tambe na tur partido ku di un òf otro manera a duna di nan banda i a hasi nan parti pa por a yega na e akuerdonan pa ku e CAO 2022.
AFBW ta pidi tur trahadó / miembro pa por kumpli kabalmente ku nan Debernan i kumpliendo ku bo Deber bo por eksigí bo Derechinan. Partidonan tur ta di opinion, pa un pas laboral na Selibon i pa huntu nos por traha na un Selibon nobo.
Direktiva di AFBW
