Riba e portada por mira e delegashon di ABV i AFBW.
Bonaire C.N. Kralendijk,
01 aprel 2023.
Siman pasa e sindikato Arubaanse Bond van werknemers in Verplegende instellingen (ABV)
tabata di bishita serka e sindikato Algemene Federatie van Bonairiaanse Werknemers (AFBW).
ABV ta un sindikato ku a wòrdu funda for di 1968, ta un sindikato ku 55 aña di eksperensia representando trahadónan den e sektor di salubridat na Aruba.
For di yanüari 2021 AFBW tin kontakto ku ABV esaki mirando ku nan ta un sindikato ku ta representá diferente organisashon den e sektor di salubridat Arubano i AFBW tambe tin representashon den e sektor di salubridat na Boneiru. Na luna di yanüari ABV a duna di konosé ku nan lo tei den luna di mart na Boneiru i Kòrsou i lo hasi AFBW un bishita i na Kòrsou lo bishita e sindikato di Curaçaose Bond van werknemers in Verplegende en Verzorgende instellingen (CBV).
ABV tabata tei ku un delegashon di tres persona, presidente Sra. Gina Maduro i Tesorera Nathalie Geerman i di parti AFBW tabata presente direktiva i shopsteward nan di Fundashon Mariadal i tambe konseheronan. Tabata un atardi hopi fruktífero kaminda a sera konosí ku otro i interkambiá di konosementu i pensamentu. Un di e punto nan ku sigur tabata tin hopi pregunta di parti ABV, tabata e proyekto ku AFBW ta kanando ku ta e “Zorg CAO BES”.
AFBW a splika kon nan ta eksperensiando esaki te ku awor pa ku e otro kompañeronan sindikal di Saba i Sint. Eustatius i dunadónan di trabou den e sektor di salubridat ku ta trahando huntu pa por logra esaki.
Na final di reunion AFBW tambe a primintí ABV ku nan lo debolbé nan un bishita, keda pendiente pa esaki.
